Mindfulness-ээр хэрхэн оюун ухаанаа тайвшруулах вэ?
Нийтэлсэн: 2024.05.03 | Зохиогч: Андреа Симонс
Өглөө нүдээ нээснээс орой унтах хүртэл бидний оюун ухаан байнга АСААЛТТАЙ байдаг. Амьдрал стресстэй байдаг ч шалтгаануудыг нь тогтмол бодох нь улам их стресст өртүүлдэг. Бид бол бие хүмүүс тул өөртөө зүгээр л өөрийнхөөрөө орших боломжийг заавал олгох хэрэгтэй!
Тасралтгүй бодох нь стресс үүсгэдэг
Бид ажил дээрээ тулгамдаж буй асуудлуудад дүн шинжилгээ хийж, оройн хоолондоо юу хийхээ шийдэж, хийх зүйлсийнхээ жагсаалтад нэг зүйлийг нэмэх зэргээр өдөр хоногийг тасралтгүй бодож өнгөрүүлдэг. Хэдийгээр эдгээр нь бидний хийх ёстой зүйлс боловч хэт их бодох нь бидний оюун санааны эрч хүчийг эрчимтэй зарцуулж, архаг стресс, түгшүүрийн эх үүсвэр нь болдог. Стресс нь эргээд бие махбодод толгой өвдөх, нуруу өвдөх, нойргүйдэх зэрэг шинж тэмдгүүдээр илэрч, арьсны асуудал, сэтгэлийн хямрал, тамхи татах, архи хэтрүүлэн хэрэглэх зэрэг эрүүл бус үйлдэл хийхэд хүргэдэг.
Тэгэхээр стресстэй хэрхэн тэмцэх вэ?
Бид бүгдэд тайвшрах өөр өөр аргууд байдаг ч мэргэжилтнүүд болон эрүүл мэндийн ажилтнуудын хамгийн их зөвлөдөг аргачлал бол mindfulness юм. Mindfulness гэдэг нь аливаа нэгэн шүүлт болон хязгаарлалтгүйгээр, элдэв зүйл бодохгүй эсвэл хийхгүйгээр анхаарлаа яг тухайн мөчид ухамсартайгаар төвлөрүүлэхийг хэлдэг.
Mindfulness ямар ач тустай вэ?
Mindfulness-ийг хэрэгжүүлж сурснаар стресс, сэтгэл түгших байдал буурч стрессийн эсрэг дархлаатай болохоос гадна анхаарал төвлөрөл сайжирна, нойр чанартай болно, мөн хүн хоорондын харилцаа сайжирна гэх ач тустай. Mindfulness бясалгалыг хэрэгжүүлдэг хүмүүс өөрийгөө хайрлаж энэрэх мэдрэмж өндөртэй, ерөнхий сайн сайхан байдлаа илүү сайн мэдэрч чаддаг байхаас гадна мэдрэмжүүдээ эсвэл түгшүүрээ хянах чадвар өндөртэй байдаг.
